介绍完喺坐月期间点样补气血同埋开刀坐月有咩需要注意之后，另一个好多新手妈妈关心嘅问题就系「排恶露」。恶露系指喺产后排出身体嘅分泌物，每位妈妈喺生完BB之后都会排恶露。有好多妈妈或者会觉得已经生完BB，唔使再点样护理私密部位，所以就掉以轻心。但其实恶露排出嘅过程有好多隐忧，处理得唔好嘅话可能会不停流恶露、肚腹位置疼痛、子宫瘀血内阻，有机会影响下次怀孕，甚至造成细菌感染之类嘅后遗症，问题可大可小，所以新手妈妈应该花啲功夫好好处理恶露问题。
恶露是什么？
恶露系指喺产后排出身体嘅分泌物，例如系胎膜、胎盘组织、脱落嘅子宫虹膜，一般会持续大概2至6个礼拜。恶露可以分为三个阶段，初期嘅恶露系鲜红色嘅，而且有一啲血块，大概会持续3至4日，然之后会慢慢变成紫色或者啡色，形态亦会变成浆糊状，大概持续半个月左右。随住时间推移，恶露会愈嚟愈少，白血球亦都会慢慢增加，变成白色嘅液体状。
排恶露喝什么？
1. 生化汤
生化汤系好多医师都大力推荐嘅排恶露中药配方，有促进子宫收缩、散瘀止血同温经止痛嘅功效，可以针对新手妈妈要排清恶露同埋瘀血积聚喺肚腹位置嘅问题。生化汤主要有五种药材，包括桃仁、当归、川芎、炮姜同炙甘草。桃仁性平味辛，炮姜性温味苦，两者都有活血袪瘀、温经止血嘅作用；当归同川芎性温味甘，可以行气调经；而炙甘草可以调和五种药材，加强温经活血嘅功效，有助排走恶露，亦都可以治疗积瘀血、子宫疼痛、恶露不行等等嘅衍生问题。
顺产妈妈可以喺产后第3日开始饮，每日一帖，饮7至10日。而开刀妈妈可以喺产后一个礼拜、排完气之后饮，都系每日一帖，但饮5至7日就够。生化汤唔可以饮太多，产后两个礼拜之后就唔好再饮，饮得太多反而会窒碍子宫内膜嘅复原，所以要适可而止。
2. 廿八方
廿八方第一方系生化汤嘅加减方，都系传统嘅排恶露中药配方，经过专家调配，更加适合体虚嘅新手妈妈。两者同样含有当归头、川芎、桃仁、炙甘草同炮姜五种药材，有头先讲过嘅活血袪瘀、行气调经功效，帮助排清恶露，而且仲有白背木耳等等嘅药材，白背木耳含有丰富嘅铁质同钙质，可以增加血红素同修复子宫，令妈妈嘅身体可以尽快复原。而且廿八方系针对新手妈妈喺坐月期间嘅所有需要，除咗排恶露之外，其余四方可以调理身体嘅其他部位，全面补身、补血气，同埋增强免疫力抵御风寒，成效亦都非常显著，绝对系新手妈妈嘅产后调理恩物。
成个廿八方药疗系要食28日，顺产妈妈应该喺生完之后嘅第4至7日开始饮第一方，而开刀妈妈就可以喺第8至12日开始饮，视乎翻每位妈妈排恶露嘅时间。饮完第一方之后就顺序继续饮落去，直至饮完成个药疗配方。
3. 益母草水
益母草水有别于上述嘅两款药疗，属于食疗，系一种针对新手妈妈需要嘅清恶露汤水嚟。益母草，亦即系坤草，性微寒、味苦辛，有宫缩、化瘀嘅功效，可以活血、祛瘀同调经，专门治疗恶露不尽、产后出血等一啲新手妈妈会面对嘅产后不适，绝对系妇科良药，亦都因为咁而有「益母草」呢个花名。妈妈只系需要将一撮益母草加滚水，煲5至10分钟就饮得，简单方便。
新手妈妈可以喺产后第一个礼拜嘅平补期开始饮，但同样唔可以饮太多，因为益母草具有一定药性，会造成肌肉抽搐之类嘅情况，如果饮得太密可能会对身体造成亏损，而且药性带寒，身体特别虚弱嘅妈妈要注意饮用。就算身体好强壮，大概3至4日饮一次就够。
4. 山楂红糖水
虽然山楂同红糖都系比较常见嘅食材，但功效绝对拍得住益母草水，而两者都同样系专门治疗产后不适征状嘅排恶露汤水。山楂性温味酸甘，有活血化瘀嘅功效；红糖性温味甘，可以补气养血，而且有宫缩作用，令胎盘组织尽快化成瘀血、排清恶露。
山楂同红糖虽然性温，但对身体冇咩副作用，新手妈妈可以喺产后第一个礼拜日日饮都冇问题。
关于恶露慨谬误
1. 部份排恶露食物其实唔应该食
网上面有啲人话坐月期间应该食多啲阿胶、姜同酒，有助排清恶露，但其实呢三种排恶露食物系唔应该食慨。
首先，阿胶系大补之物，虽然可以补充身体流失慨气血，对妈妈复原身体有帮助。但系喺产后头一两个礼拜身体较为虚弱，唔适宜大补。而且如果恶露流量多慨话，好可能系因为子宫收缩得唔好，或者子宫入面有胎盘组织残留。未排清恶露就进食阿胶补身，有机会令恶露残留喺体内，导致恶露不尽，所以喺恶露排清之前都尽量唔好食阿胶。
又有啲讲法系话煲排恶露汤水慨时候可以落啲姜丝，除咗可以调味之外，姜仲有祛风驱寒慨功效，刺激子宫收缩，有助恶露排出。但其实喺产后初期系唔应该食姜慨。姜性温热，喺新手妈妈身体未完全复原慨时候唔适宜进食呢啲燥热食物，容易出现发烧、胃酸倒流，甚至大量出血慨情况。而且太早食姜会令子宫过度收缩，打乱妈妈身体复原慨进度。产后妈妈可以改用炮姜，热性比姜或者干姜低，温补散寒之余，刺激性同时又细啲，比较适合产后服用。
有人亦都会推荐饮豆腐酿酒汤，或者喺生化汤度加酒，因为酒有活血功效，但其实酒同时会助湿热、行血动经，同姜一样有机会造成出血问题，令排恶露慨情况恶化，所以喺产后坐月期间应该禁酒。
2. 排恶露伤口唔使护理？
有好多新手妈妈见到网上面话顺产造成慨阴道撕裂伤唔使特别照顾，亦都可以直接掂水，所以就唔理渠。无错，虽然正常嚟讲个伤口系唔使点样护理都会好翻，但流出嚟慨恶露可能会感染到个伤口，所以喺坐月初期都唔可以完全唔理，需要护理一吓伤口。
喺坐月头一个礼拜，去完厕所之后，可以简单冲洗一吓私密位置。两个礼拜之后恶露会开始变少，咁就唔需要洗得咁密，可以等有恶露慨时候先清洗。喺坐月初期可以用一啲夜用型卫生巾，大概每2至3个钟换一次，避免恶露长期罨住，同埋避免细菌感染。恶露开始减少慨时候就可以转用普通卫生巾，再少啲慨时候就用护垫，等到大概6个礼拜之后就唔需要再垫。
注意事项
1. 产后初期应该坚持哺乳，因为身体持续分泌母乳可以刺激催产素分泌，促进子宫收缩，加快将胎盘组织排出身体慨时间，快啲将恶露排清晒。
2. 新手妈妈应该尽量少食寒性食物，例如生果、冻饮呢啲都唔得，因为身体仍然未复原，气血亏虚，呢啲寒凉食物会窒碍气血流动、伤脾胃，亦都会令恶露同瘀血冇办法排出体外，所以坐月期间唔适宜食太多寒性食物。
3. 如果恶露有臭味、颜色变深、出现瘀块、流量不断增多，又或者排恶露超过一个月，呢啲都系异常情况，好可能系子宫或者阴道受到感染，应该尽早去医院检查求医。
